ភ្នំពេញៈ រដ្ឋបាលរាជធានីភ្នំពេញបានត្រៀមកន្លែងជិត ១ ពាន់ទីតាំង ដោយយករមណីយដ្ឋានប្រវត្ដិសាស្ដ្រវត្ដភ្នំជាទីតាំងធំសម្រាប់ការរៀបចំពិធីទទួលទានអំបុកខ្មែរ ការពារជាតិ សាសនា ព្រះមហាក្សត្រនៅថ្ងៃទី ៩ ខែវិច្ឆិកា ខាងមុខ និងរំពឹងថាមានពលរដ្ឋចូលរួមប្រមាណ ១០ ម៉ឺននាក់។ នេះបើតាមលោក ម៉េត មាសភក្ដី អ្នកនាំពាក្យសាលារាជធានីភ្នំពេញប្រាប់កម្ពុជាអច្ឆរិយម្សិលមិញ។
លោក មាសភក្ដី បានថ្លែងថា ដើម្បីត្រៀមលក្ខណៈនៃដំណើរការរៀបចំពិធីទទួលទានអំបុកខ្មែរនេះកាលពីថ្ងៃព្រហស្បតិ៍ម្សិលមិញ រដ្ឋបាលរាជធានីភ្នំពេញបានបើកកិច្ចប្រជុំមួយបន្ថែមទៀតជាមួយក្រុមការងារថ្នាក់ខណ្ឌ និងមន្ត្រីជំនាញ ដើម្បីរៀបចំពិធីនេះឲ្យដំណើរការទៅបានដោយរលូន និងការពារក្ដីសុខ សុវត្ថិភាពដល់ប្រជាពលរដ្ឋដែលចូលរួមសប្បាយរីករាយ។
លោកថ្លែងថា៖ «យើងនឹងយកទីតាំងរមណីយដ្ឋានប្រវត្ដិសាស្ដ្រវត្តភ្នំជាទីតាំងធំជាងគេសម្រាប់ប្រារព្ធពិធីទទួលទានអំបុកនេះក្នុងនោះយើងនឹងរៀបចំពិធីទទួលទាននៅតាមសង្កាត់តាមខណ្ឌ តាមមូលដ្ឋាន សហគមន៍ ដើម្បីឲ្យបងប្អូនប្រជាពលរដ្ឋជួបជុំគ្នាទទួលទានអំបុកនេះរួមគ្នាផងដែរ»។
លោកបានបន្ដថា៖ «តាមការប៉ាន់ស្មានរបស់យើងបានត្រៀមទីតាំងប្រមាណជិត ១ ពាន់ទីតាំង ដែលស្ថិតនៅក្នុងភូមិសាស្ដ្ររាជធានីភ្នំពេញ។ ដោយឡែកព្រឹត្ដិការណ៍នេះនឹងមានរៀបចំប្រារព្ធធ្វើនៅទូទាំងប្រទេសផងដែរ»។
អ្នកនាំពាក្យរូបនេះបានឲ្យដឹងថា ការត្រៀមលក្ខណៈរៀបចំពិធីទទួលទានអំបុកនេះជាការត្រៀមអបអរពិធីបុណ្យអុំទូក អកអំបុក និងសំពះព្រះខែ និងត្រៀមអបអរដល់ថ្ងៃទិវាឯករាជ្យជាតិ ៩ វិច្ឆិកា និងការរីករាយជុំគ្នានៃមហាគ្រួសារខ្មែរផងដែរ។
លោកបានបន្ដថា៖ «យើងនឹងត្រៀមអំបុកឲ្យបងប្អូនមកចូលពិសាអំបុកដោយសេរី មិនគិតថ្លៃតាមកន្លែងនានា។ បើបងប្អូនយើងមានទីលំនៅក្នុងរាជធានីភ្នំពេញចង់មកចូលរួមសប្បាយគឺអាចទៅទីតាំងកន្លែងដែលយើងរៀបចំនេះក្នុងស្មារតីសាមគ្គីគ្នាអបអរពិធីបុណ្យជាតិយើង»។
អភិបាលរងរាជធានីភ្នំពេញលោក មាន ចាន់យ៉ាដា អ្នកដឹកនាំក្រុមការងារថ្នាក់ខណ្ឌ និងមន្ត្រីជំនាញ ដើម្បីរៀបចំពិធីទទួលទានអំបុកនេះកាលពីម្សិលមិញបានអំពាវនាវឲ្យប្រជាពលរដ្ឋចូលរួមសប្បាយរីករាយ និងអបអរសាទរក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ។ ពិធីបុណ្យនេះនឹងប្រព្រឹត្តទៅនៅថ្ងៃទី ១០-១១-១២ ខែវិច្ឆិកាខាងមុខនេះរួមជាមួយនឹងមោទនភាពចំពោះសមិទ្ធផលនានារបស់រាជធានីភ្នំពេញដែលបាននិងកំពុងរីកចម្រើននាប៉ុន្មានឆ្នាំចុងក្រោយនេះ។
លោកថ្លែងថា៖ «ដើម្បីត្រៀមអបអរពិធីនេះ រដ្ឋបាលរាជធានីភ្នំពេញបានត្រៀមកងកម្លាំងរួចរាល់ ដើម្បីរក្សាសន្ដិសុខ សុវត្ថិភាពដល់បងប្អូនប្រជាពលរដ្ឋដែលបានមកចូលរួមសប្បាយរីករាយក្នុងពិធីបុណ្យនេះ»។ ប៉ុន្តែលោកមិនទាន់អាចបញ្ជាក់បានថា អាជ្ញាធរនឹងត្រៀមកម្លាំងសមត្ថកិច្ចចំនួនប៉ុន្មានសម្រាប់រក្សាការពារសន្តិសុខក្នុងពិធីបុណ្យអុំទូកនោះទេ។
សម្តេចនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី ២ ខែតុលាកន្លងទៅនេះយកថ្ងៃទី ៩ វិច្ឆិកា រៀបចំពិធីទទួលទានអំបុកខ្មែរនៅទូទាំងប្រទេស ដើម្បីការពារជាតិ សាសនា ព្រះមហាក្សត្រ។ ជាមួយគ្នានោះលោកក៏បានព្រមានអ្នកដែលមកចូលរួមផ្តួលរំលំរដ្ឋាភិបាលកម្ពុជាដែលដឹកនាំដោយលោក សម រង្ស៊ី ប្រធានស្តីទីអតីតគណបក្សសង្គ្រោះជាតិនៅក្នុងថ្ងៃនោះដែរ ខណៈដែលលោក សម រង្ស៊ី បានកំណត់ពេលត្រូវវិលត្រឡប់មកកម្ពុជាវិញជាមួយនឹងការបំផុសពលរដ្ឋឲ្យបះបោរនៅថ្ងៃទី ៩ វិច្ឆិកា ក្នុងគោលបំណងផ្លាស់ប្តូររបបសម្តេចនាយករដ្ឋមន្ត្រី ហ៊ុន សែន៕
About www.kampucheaacharyak.com
0 comments:
Post a Comment